قابل كابتن ماجد
سمعت قبل كدا عن كابتن ماجد؟
شوفت قد ايه كان بيستمتع بكل دقيقة في اللعبة؟
لاحظت ازاي بيعمل كل حاجة عشان يسجل الهدف؟
ده .. كان اكبر الهام في حياتي!
كابتن ماجد
أهلًا بيك. أنا كابتن ماجد، اونلاين كوتش، ماستر من ISSA
وحاصل على ٩ شهادات دولية من ISSA
والنسخة الحقيقية من كابتن ماجد اللي تعرفه .. في المجال الرياضي.
القصة كلها بدأت لما بدأت اروح الجيم وانا لسة في المدرسة .. الموضوع على اد ما كان متعب .. لكن ممتع .. واكتشفت هواية جديدة .. وهي اني اروح هناك، اتمرن، واقضي وقت وسط الأجهزة والأوزان.
لحد هنا .. الموضوع كان مجرد هواية ..
مكنتش لسة اعرف هتاخدني لفين في الحياة.
كبرت واخترت الكلية واللي ملهاش اي علاقة بالجيم او الرياضة - كنت دايمًا الطالب الدحيح ابو نضارة، اللي مش بس هيذاكر المنهج من الجلدة للجلدة .. لكن كمان هيشوف ايه اللي يكمل المنهج ويروح يذاكره!
وبرغم كدا الجيم والتدريب كان لسة موجود في حياتي.
وكنت بذاكر تشريح و تغذية و اخد كورسات و انا فى الجامعة و اطور من نفسى اكتر طول فترة الجامعة
بعد التخرج .. وبرغم ترتيبي على دفعتي .. حسيت ان مش ده اللي عاوز اعمله
اه انا كنت معجب بمجالي .. لكن بحب الجيم .. اقضي وقت كبير هناك .. اتمرن .. واساعد الناس اللي لسة بتبدأ.
كان دايمًا عندي شغف وفضول اعرف اكتر عن ازاي جسمنا بيبني عضلات .. ازاي الحركات المختلفة ليها تأثير مختلف .. وازاي فرق بسيط بس في زاوية الجسم يقدر يعمل نتايج مختلفة تمامًا!
هنا قررت اخد الخطوة اللي بتخليني اكلمك النهارده.
واحول من مجال دراستي لمجال كامل من التدريب، التعليم، والعلوم المختلفة الخاصة بالجسم وتشريحه وحركته.
وكانت اول خطوة لده اني اكون اونلاين كوتش
لكن ..
الجزء الدحيح اللي جوايا كان لسة عايش .. وعشان كدا مقدرتش ادخل المجال من غير ما ادرس الشهادات اللي تخليني اقدم الخدمات بتاعتي على اساس علمي قوي.
بدأت ادرس شهادات ISSA .. واحدة ورا التانية .. لكن الموضوع موقفش هنا. ابتديت - زي ما كنت بعمل في الكلية - اشوف ايه اللي ممكن يكمل شغلي بمعلومات ودراسة تساعدني اكون شايف الصورة كاملة.
وهنا لقيت علم الحركة بيشدني شوية بشوية. ابتديت كطالب شاطر بيحاول يفهم .. و دلوقتى بقيت اونلاين كوتش للمتدربين و محاضر فى التشريح و علم الحركة و التغذية الرياضية للمدربين
في خلال الرحلة دي - واللي لسة مكملة - كنت بساعد مئات المدربين وآلاف المتدربين يوصلوا للشكل اللي بيحلموا بيه .. يبنوا كتلة عضلية .. يخسروا دهون زيادة .. ويعيشوا نظام حياة صحي لكن ممتع في نفس الوقت.
كل ده بناءًا على
الخبرة
العلم
والنتايج على أرض الواقع.
دلوقتي اكيد انت بتسأل ..
ايه علاقة كل ده بكابتن ماجد اللي نعرفه؟
هو كان بيلعب كورة
وانت في مجال الچيم والكوتشينج!
صدقني .. الموضوع ملهوش علاقة بالكورة او الچيم
الموضوع له علاقة بالشغف وحب اللي بتعمله الرحلة اللي بتمشيها الطريق اللي بتقرر تاخده عشان توصل لهدفك وفي نفس الوقت تستمتع بيه
فاكر الكرتون كويس؟
يبقى اكيد هتفتكر ازاي هو كان بيلعب طول الحلقة عشان يسجل الهدف في اخر دقيقة
لكن طول الحلقة كان مستمتع بكل حاجة بتحصل وبيعملها.
ده بالظبط اللي هيحصل في رحلتك معايا عشان تفقد وزنك وتبني عضلاتك وانت مستمتع برحلتك وأخيرا ً تعيش الحياة اللي بتحلم بيها
٩ شهادات دولية معتمدة للحصول على الماستر
مستعد تبدأ رحلتك؟
قابل الأبطال
كل دول سجلوا اهدافهم عن طريق المتابعة معايا
والأهم انهم استمتعوا بكل دقيقة في الرحلة
